By “Xəbər Yerində” xəbər verir ki, Fövqəladə Hallar Nazirliyinin Dövlət Yanğın Nəzarəti Xidməti tərəfindən Bakı şəhəri, Yasamal rayonu, Təbriz Xəlilbəyli küçəsi, ev 7 ünvanında fəaliyyət göstərən “Golden Street” hotelində yoxlama keçirilib.
Yoxlama zamanı obyektdə yanğın təhlükəsizliyi sahəsində bir sıra ciddi nöqsanlar aşkarlanıb.
Elektrik təsərrüfatında ciddi pozuntular
Müəyyən edilib ki, hotelin elektrik təsərrüfatı “Elektrik Qurğularının Quraşdırılması Qaydaları”nın tələblərinə uyğun quraşdırılmayıb.
Bundan başqa, elektrik təsərrüfatına profilaktik baxış keçirilməyib və bununla bağlı müvafiq akt tərtib olunmayıb. Elektrik naqillərinin isə yanar materialların üzəri ilə çəkildiyi aşkarlanıb.
Yanğın siqnalizasiyası tam quraşdırılmayıb
Obyektdə avtomatik yanğınxəbərverici siqnalizasiya qurğusunun tam quraşdırılmadığı müəyyən olunub. Mövcud qurğuya da lisenziyası olan təşkilat tərəfindən texniki xidmət göstərilməyib.
Hotelin mətbəxində isə yanğın təhlükəsizliyi qaydalarının tələblərinə zidd olaraq qazla işləyən kombi qurğusu quraşdırılıb.
Xalçaların təhlükəsizlik sənədləri təqdim edilməyib
Obyektdə döşəmənin üzlənməsində istifadə olunan xalça örtüklərinin yanğın təhlükəsizliyi göstəricilərini təsdiq edən müvafiq sertifikat və uyğunluq sənədləri təqdim edilməyib.
Həmçinin hotelin ərazisində olan odsöndürən balonların tərkibi yenisi ilə əvəz olunmayıb və onlar döşəmə səviyyəsindən 1,5 metr hündürlükdə yerləşdirilməyib.
Təxliyə planı və “Çıxış” göstəriciləri yoxdur
Yoxlama zamanı müəyyən edilib ki, yanğın təhlükəsizliyinin təmin olunması məqsədilə təlimat və yaddaş kitabçaları hazırlanmayıb.
Yanğın zamanı insanların təxliyə edilməsi üçün köçürmə planı da tərtib olunmayıb.
Bundan əlavə, insanların təxliyəsi üçün üzərində “Çıxış” sözü yazılmış işıqlı göstəricilər quraşdırılmayıb. Təxliyə yollarının da yanğın təhlükəsizliyi tələblərinə uyğun saxlanılmadığı müəyyən edilib.
Hotel yanğın su hovuzu ilə təmin olunmayıb
FHN-in yoxlaması zamanı daha bir nöqsan kimi obyektin yanğın su hovuzu ilə təmin olunmadığı müəyyənləşdirilib.
Həmçinin hotelin istismarının Dövlət Yanğın Nəzarəti Xidməti ilə razılaşdırılmadığı aşkarlanıb.
FHN hotelin fəaliyyətini dayandırıb
Nazirlik bildirib ki, mövcud vəziyyət obyektin istismarının davam etdirilməsi halında orada baş verə biləcək yanğının qısa müddətdə genişlənərək ağır nəticələrə səbəb ola biləcəyini göstərir.
Aşkar olunan yanğın təhlükəsizliyi norma və qaydalarının kobud pozuntuları nəzərə alınaraq, Bakı şəhəri, Yasamal rayonu, Təbriz Xəlilbəyli küçəsi, ev 7 ünvanında fəaliyyət göstərən “Golden Street” hotelinin fəaliyyətinin dayandırılması barədə Qərar qəbul edilib.
Qərarın bir nüsxəsi obyektin nümayəndəsinə təqdim olunub.
