By Azərbaycan Prezidenti İlham Əliyevin Milli Məclisin 2026-cı il iyulun 14-də qəbul etdiyi və bir sıra qanunvericilik aktlarına dəyişiklikləri nəzərdə tutan qanunu imzalamayaraq parlamentə geri göndərməsinin səbəbləri açıqlanıb.
“Xəbər Yerində” APA-ya istinadən xəbər verir ki, məsələ Milli Məclisin İqtisadi siyasət, sənaye və sahibkarlıq komitəsinin iclasında müzakirə olunub.
Komitə sədri Azər Əmiraslanov bildirib ki, dövlət başçısı innovasiya ekosistemi çərçivəsində dövlət dəstəyinin və stimullaşdırıcı mexanizmlərin daha da təkmilləşdirilməsi məqsədilə qəbul edilmiş qanuna bir sıra mühüm dəyişikliklərin edilməsini təklif edib.
Qanunun əsas məqsədi dəyişmir
Qeyd olunub ki, təklif edilən yeni redaksiyada qanunun əsas konsepsiyası və qarşıya qoyulan hədəflər saxlanılır.
Əsas məqsəd ölkədə innovativ iqtisadiyyatın inkişafını sürətləndirmək, eləcə də bu sahəyə özəl investisiyaların cəlb olunmasını stimullaşdırmaqdır.
Prezidentin təklif etdiyi dəyişikliklərin qanunun ilkin məqsədini qorumaqla yanaşı, onun tətbiqi mexanizmlərinin daha da təkmilləşdirilməsinə yönəldiyi bildirilib.
Yeni dəyişikliklər nəticəsində innovativ fəaliyyətə dövlət dəstəyinin daha hədəfli, ünvanlı və nəticəyönümlü şəkildə həyata keçirilməsi nəzərdə tutulur.
Özəl texnologiya şirkətləri üçün yeni imkanlar
Rəqəmsal inkişaf və nəqliyyat nazirinin müavini Elmin Məmmədov sənəddə rəqəmsal iqtisadiyyatın, informasiya-kommunikasiya texnologiyalarının, innovasiya ekosisteminin və startapların inkişafında yeni mərhələ yaradacaq genişmiqyaslı təkliflərin yer aldığını bildirib.
Onun sözlərinə görə, islahat dövlət sektoruna aid olmayan və dövlətin payının 51 faizdən aşağı olduğu özəl texnologiya subyektlərini əhatə edəcək.
Bu dəyişikliklərin ölkənin texnoloji inkişafının sürətləndirilməsinə xidmət etməsi nəzərdə tutulur.
Bildirilib ki, iri sahibkarlıq subyektlərinin nəzərdə tutulan geniş vergi güzəştlərindən yararlanması üçün onların ümumi gəlirlərində ixracın müəyyən xüsusi çəkisinin olması, həmçinin vəsaitlərin yerli banklara gətirilməsi şərti müəyyənləşdirilir.
Yeni rejimin 1 yanvar 2027-ci ildən sonra şəhadətnamə alacaq yeni rezidentlərə tətbiq ediləcəyi qeyd olunub. Hazırda fəaliyyət göstərən rezidentlər isə mövcud hüquqi statusları çərçivəsində fəaliyyətlərini davam etdirə biləcəklər.
Neft-qazdan asılılığın azaldılması hədəflənir
İclasda vurğulanıb ki, təklif olunan dəyişikliklər Azərbaycanın iqtisadiyyatının neft-qaz sektorundan asılılığının azaldılması, ölkəyə intellektual kapitalın cəlb edilməsi və yerli innovativ brendlərin beynəlxalq bazarlara çıxış imkanlarının genişləndirilməsi baxımından yeni imkanlar yarada bilər.
İqtisadiyyat nazirinin birinci müavini Elnur Əliyev isə sənəddə nəzərdə tutulan vergi güzəştlərinin əsas istiqamətlərindən danışıb.
O bildirib ki, güzəştlər vahid sistem şəklində təqdim olunur. Eyni zamanda onların uzunmüddətli xarakter daşımasının investisiya mühitinin cəlbediciliyi və sahibkarların rəqabət imkanları baxımından əhəmiyyətli olduğu vurğulanıb.
Dövlət Vergi Xidmətinin rəis müavini Samirə Musayeva isə təklif olunan vergi təşviqlərinin hansı subyektlərə şamil ediləcəyi və onların əhatə dairəsi barədə məlumat verib.
Dəyişikliklər komitədə dəstəklənib
Müzakirələrin sonunda yenilənmiş qanunun Prezident İlham Əliyevin təklif etdiyi dəyişikliklər nəzərə alınmaqla qəbul edilməsi məqsədəuyğun hesab edilib.
Müvafiq qərar komitə üzvləri tərəfindən yekdilliklə dəstəklənib.
