Cibuti sahillərində baş verən faciədə ölənlərin sayı 139-a çatdı

Cibuti sahillərində miqrantları daşıyan qayığın batması nəticəsində ölənlərin sayı 139 nəfərə yüksəlib. Hadisədən sonra 84 nəfər itkin düşmüş hesab olunur.

Xəbər Yerində APA-ya istinadən xəbər verir ki, bu barədə Beynəlxalq Miqrasiya Təşkilatı (IOM) “Reuters”ə açıqlamasında məlumat yayıb.

Qayıqda 305 nəfər olub

Məlumata görə, Cibutidən Yəmənə doğru hərəkət edən və göyərtəsində 305 nəfərin olduğu qayıq oktyabrın 8-dən 9-na keçən gecə Obok liman şəhərinin şimalında, Quhere yaşayış məntəqəsi yaxınlığında batıb.

Faciə nəticəsində ölənlər arasında azı 15 uşaq var. Hadisədən sonra 82 nəfər sağ xilas edilib. Xilas olunanların hamısının Efiopiya vətəndaşları olduğu bildirilir.

Axtarış-xilasetmə əməliyyatı davam edir

Beynəlxalq Miqrasiya Təşkilatının Cibutidəki nümayəndəliyinin rəhbəri Aleksandr Kuassak bildirib ki, təşkilatın əməkdaşları yerli qurumlarla birlikdə hadisə yerində zərərçəkənlərə yardım göstərirlər.

Cibuti hakimiyyəti tərəfindən axtarış-xilasetmə tədbirləri davam etdirilir. Sağ qalanlara tibbi yardım göstərilir, həlak olanların dəfn edilməsi üçün hazırlıq işləri görülür.

Miqrantlar Körfəz ölkələrinə çatmağa çalışıblar

Qeyd edək ki, miqrantlar Yəmən üzərindən Körfəz ölkələrinə çatmaq məqsədilə təhlükəli dəniz marşrutundan istifadə ediblər.

Beynəlxalq Miqrasiya Təşkilatının məlumatına əsasən, 2025-ci ildə bu miqrasiya marşrutu üzrə 900-dən çox insan həyatını itirib və ya itkin düşüb.