By Xəbər Yerində xəbər verir ki, Ermənistanın xarici işlər naziri Ararat Mirzoyan İrəvanla Bakı arasında ticarət əlaqələrində yeni mərhələnin başlaya biləcəyini açıqlayıb.
Mirzoyan Ermənistanın İctimai Televiziyasına müsahibəsində yaxın günlərdə erməni şirkətlərinin Azərbaycana məhsul satışı ilə bağlı ilk məlumatların açıqlanacağını bildirib.
Nazirin sözlərinə görə, indiyədək əsasən Azərbaycanın Ermənistana məhsul tədarük etməsi barədə danışılıb. Lakin qarşıdakı dövrdə ticarətin qarşılıqlı xarakter alması gözlənilir.
“Yaxın günlərdə Azərbaycan şirkətlərinin Ermənistan şirkətlərindən məhsul alması barədə məlumat əldə edəcəksiniz. Ermənistan Azərbaycana məhsul satacaq. Beləliklə, ticarət ikitərəfli olacaq”, – Mirzoyan deyib.
Qeyd edək ki, 2026-cı ildə Azərbaycan tərəfindən Ermənistana müxtəlif məhsulların, o cümlədən yanacaq məhsullarının tədarükü həyata keçirilib. Azərbaycan məhsullarının Ermənistana ixracı 2025-ci ilin sonunda yanacaq tədarükü ilə başlamışdı.
2026-cı ilin ilk rübündə Azərbaycanın Ermənistana ixracı 5,7 milyon dolları keçib, Ermənistanın Azərbaycana ixracı isə həmin dövrdə cəmi 960 dollar təşkil edib.
Mirzoyanın son açıqlaması baş tutacağı təqdirdə iki ölkə arasında ticarət dövriyyəsinin qarşılıqlı xarakter alması baxımından diqqətçəkən hadisə olacaq.
Mənbə: Qafqazinfo
