By Xəbər Yerində KONKRET.az-a istinadən xəbər verir ki, Müasir Müsavat Partiyasının sədri Hafiz Hacıyev Azərbaycan Yerüstü Nəqliyyat Agentliyinin (AYNA) fəaliyyəti ilə bağlı sərt fikirlər səsləndirib.
O, AYNA-nın rəhbəri Anar Rzayevin vaxtilə Şəmsəddin Hacıyevin rektorluğu dövründə Azərbaycan Dövlət İqtisad Universitetində prorektor vəzifəsində çalışdığını bildirib.
Hafiz Hacıyev iddia edib ki, Anar Rzayev müxtəlif şəxslərin vasitəsilə AYNA rəhbərliyinə gətirilib və qurumun fəaliyyəti nəticəsində ölkənin nəqliyyat sistemində ciddi problemlər yaranıb.
“AYNA-ya bu gün ehtiyac varmı?”
Partiya sədri AYNA-nın fəaliyyətinin məqsədəuyğunluğunu da şübhə altına alıb.
“Bu gün AYNA adlı quruma nə ehtiyac var? AYNA-nı Rəqəmsal İnkişaf və Nəqliyyat Nazirliyi idarə etməlidir. AYNA dövlət büdcəsinə bir qəpik pul köçürmür. Bəlkə, kimlərinsə cibinə köçürür, bunu deyə bilmərəm, amma bu qurumda şəffaflıq yoxdur”, – deyə Hacıyev bildirib.
O, AYNA əməkdaşlarının əməkhaqlarının artırılması ilə bağlı müzakirələrə də münasibət bildirib.
“Deyirlər ki, AYNA-nın işçilərinin maaşı artırılmalıdır. Yaxşı, AYNA-ya borcumuz var ki, xalq işləsin, qurumun işçilərinin maaşı qalxsın? AYNA təcili ləğv edilməli, başında dayanan da həbs olunmalıdır!” – deyə partiya sədri vurğulayıb.
“Xalq cana-boğaza yığılıb”
Hacıyev AYNA-nın tətbiq etdiyi bəzi nəqliyyat və parklanma tədbirlərinin vətəndaşların narazılığına səbəb olduğunu iddia edib.
Onun sözlərinə görə, yolların müəyyən hissələrində xətlərin çəkilməsi, velosiped zolaqlarının yaradılması və digər dəyişikliklər şəhərdə nəqliyyat problemini həll etməyib.
“AYNA-nın bu gün camaatın evinin qarşısında xətt çəkməsi insanları qıcıqlandırmaq deməkdir. Hesablansın, görək, bu AYNA-dan neçə manat dövlət büdcəsinə köçüb? Bundan başqa, insanlar nə qədər tıxacda qalır?! Bakı batıb, tərpənmək olmur”, – deyə Hacıyev bildirib.
O, son vaxtlar şəhərdə avtomobillə hərəkət etməkdənsə, piyada getməyə üstünlük verdiyini söyləyib.
“AYNA-ya yığılan pullar hara gedib?”
Partiya sədri AYNA-nın topladığı vəsaitlərlə bağlı hesabat tələb edib.
“Neçə illərdir AYNA-ya yığılan pullar təcili hesablanmalı, görək, Azərbaycan xalqından bu günə qədər yığılan pullar hara gedib? Millət od püskürür, qarşısını zorla alırıq”, – deyə o qeyd edib.
Hacıyev bildirib ki, partiyaya müraciət edən vətəndaşlar arasında AYNA-nın fəaliyyətindən narazı olanların sayı çoxdur.
Velosiped zolaqları və tıxaclar
Hacıyev şəhərdə yaradılan velosiped zolaqlarını da tənqid edib.
“Şəhərdə velosiped sürən varmı ki, velosiped zolağı çəkirsən? O zolaqdan bir nəfər adam gedirmi? Getmir! Bir saatdan bir avtobus gəlir. Velosiped yolu isə boşdur”, – deyə o bildirib.
Onun sözlərinə görə, nəqliyyat sistemində əsas məqsəd tıxacların azaldılması və vətəndaşların gündəlik hərəkətinin asanlaşdırılması olmalıdır.
“Mağazanın qarşısında maşın saxlamaq olmur”
Hafiz Hacıyev parklanma qaydalarının sahibkarlara və vətəndaşlara yaratdığı çətinliklərdən də danışıb.
“Kimsə mağaza açır, bu mağazanın qarşısında maşın dayana bilməlidir ki, adam özünə su alsın. Aptekin qarşısında maşın saxlayıb dərman almaq olmur. AYNA buna imkan vermir”, – deyə partiya sədri bildirib.
O, AYNA-nın ləğv edilməsinin cəmiyyətdəki narazılığın azalmasına səbəb ola biləcəyini iddia edib.
“AYNA ləğv edilsə, bəlkə, xalqın bir az hirsi soyuyar ki, haqq-ədalət öz yerini tutdu. Əminəm ki, bizim bu çağırışımızı ölkə başçısı eşidəcək”, – deyə Hacıyev əlavə edib.
Qeyd edək ki, Hafiz Hacıyevin səsləndirdiyi fikirlər onun mövqeyidir. Onun AYNA və qurumun rəhbərliyi ilə bağlı irəli sürdüyü iddialara dair qarşı tərəfin mövqeyi mətndə təqdim olunmayıb.
