Pit Heqset İsrailə gizli səfər etdi – Netanyahu ilə nə müzakirə olunub?

ABŞ müdafiə naziri Pit Heqset İsrailə əvvəlcədən elan edilməyən səfər edib. O, Baş nazir Benyamin Netanyahu ilə görüşüb, lakin danışıqların məzmunu açıqlanmayıb.

Xəbər Yerində xəbər verir ki, Reuters agentliyinin məlumatına görə, görüş oktyabrın 19-da baş tutub. Axios nəşrinin məlumatlı mənbələrinə əsasən, Heqset və Netanyahu İsrailin cənubunda yerləşən Ovda aviabazasında bir araya gəliblər.

Məlumata görə, Heqset səfər çərçivəsində aviabazada yerləşən ABŞ hərbçiləri ilə də görüşüb. O, sosial şəbəkədə ABŞ Mərkəzi Komandanlığının məsuliyyət zonasındakı hərbçiləri ziyarət etdiyini bildirib, lakin İsrailə səfəri barədə açıq açıqlama verməyib.

ABŞ Pentaqonu və İsrailin Vaşinqtondakı səfirliyi səfərlə bağlı şərh sorğularına dərhal cavab verməyib. İsrail baş nazirinin ofisi də məsələ ilə bağlı açıqlama yaymayıb.

Səfər regionda ABŞ və İran arasında gərginliyin artdığı, eyni zamanda İsraildə oktyabrın 27-nə təyin edilmiş parlament seçkilərinə hazırlıq getdiyi bir vaxta təsadüf edib. ABŞ Prezidenti Donald Tramp da səfərdən bir gün əvvəl Netanyahuya seçkilərdə dəstəyini ifadə edib.

Bununla belə, Heqsetlə Netanyahunun konkret hansı məsələləri müzakirə etdiyi barədə rəsmi məlumat yoxdur.