By Portuqaliya millisinin kapitanı Kriştiano Ronaldo ilə baş məşqçi Jorje Jezuş arasında yaşanan gərginlik ölkədə geniş müzakirələrə səbəb olub.
Xəbər Yerində xəbər verir ki, Ronaldo milli komandanın düşərgəsini tərk etdikdən sonra onun tərəfdarları tərəfindən Lissabon və Oeyraş şəhərlərində dəstək plakatları yerləşdirilib. Plakatlarda futbolçuya təşəkkür ifadə olunub və baş verənlərə görə baş məşqçi Jorje Jezuş tənqid edilib.
Qalmaqal Portuqaliyanın Norveçlə oyunundan sonra başlayıb. Ronaldo qarşılaşma zamanı uzun müddət isinməsinə baxmayaraq meydana buraxılmayıb. Portuqaliya həmin görüşdə 2:1 hesabı ilə qalib gəlib. Ronaldo isə matçdan sonra komanda yoldaşları ilə birlikdə azarkeşləri salamlamadan paltardəyişmə otağına yollanıb.
Bundan sonra Jorje Jezuş Ronaldonun növbəti oyunda start heyətində olmayacağını açıqlayıb. Baş məşqçi bildirib ki, komandanın heyəti və taktiki qərarlar onun səlahiyyətindədir.
Ardınca Ronaldo Portuqaliya millisinin düşərgəsini tərk edib. Futbolçu sosial şəbəkədə yazıb ki, milli komandanın baş məşqçisinin mətbuat konfransından və Portuqaliya Futbol Federasiyasının prezidenti ilə söhbətindən sonra bu qərarı verib. Ronaldo səbəblər barədə daha sonra “həqiqəti” açıqlayacağını bildirib.
Hadisə Portuqaliya ictimaiyyətində fikir ayrılığı yaradıb. Yerli mediada və azarkeşlər arasında Ronaldonu dəstəkləyənlərlə baş məşqçinin qərarını müdafiə edənlər arasında müzakirələr gedir.
Hazırda Ronaldonun Portuqaliya millisindəki gələcəyi ilə bağlı rəsmi qərar açıqlanmayıb.
