By “Xəbər Yerində” BBC-yə istinadən xəbər verir ki, Kiyev meri Vitali Kliçko Rusiyanın Ukraynanın paytaxtında ikinci böyük körpünü də hədəfə aldığını açıqlayıb. Onun sözlərinə görə, Moskva Kiyevdə kritik infrastruktura qarşı hücumlarını artırıb.
Kliçkonun açıqlamasına görə, oktyabrın 3-də səhər saatlarında baş verən hücum zamanı iki nəfər yaralanıb. “Pivnıçnıy” (Şimal) körpüsündə yol örtüyü və yerüstü trolleybus xətləri zədələnib. Nəticədə körpüdə nəqliyyatın hərəkəti məhdudlaşdırılıb və şəhərdə ciddi tıxac yaranıb.
Bu hücum Rusiyanın həftə ərzində Kiyevdə Dnepr çayı üzərində yerləşən “Pivdennıy” (Cənub) körpüsünə dəfələrlə pilotsuz uçuş aparatları ilə zərbələr endirməsindən sonra baş verib.
“Düşmən Kiyevi parça-parça edir”
Vitali Kliçko Telegram kanalında bildirib ki, Şimal körpüsünə zərbədən sonra nəqliyyatın hərəkəti bir istiqamətdə bağlanıb və təcili xidmət əməkdaşları hadisə yerinə cəlb olunub.
“Düşmən Kiyevi parça-parça edir”, – deyə mer bildirib.
Rusiya isə pilotsuz uçuş aparatlarının Ukrayna hərbçilərinin və hərbi texnikanın daşınmasında istifadə edilən hər iki körpünü vurduğunu açıqlayıb. Moskva bununla yanaşı, diplomatlar da daxil olmaqla, xarici ölkə vətəndaşlarını Kiyevi tərk etməyə çağırıb.
İki körpü Kiyevin əsas hissələrini birləşdirir
Kiyevdə Dnepr çayı üzərində yerləşən iki körpü paytaxtın qərb və şərq hissələrini bir-birinə bağlayır. Məlumata görə, cümə axşamına qədər bu körpülər Rusiyanın hücumlarının hədəfinə çevrilməmişdi.
Son hücumlar nəticəsində çayın üzərindən keçən avtomobil, dəmir yolu və trolleybus əlaqələrində ciddi problemlər yaranıb. Davam edən dron təhlükəsi digər marşrutlarda da məhdudiyyətlərə səbəb olub və şəhər yollarında böyük tıxaclar meydana gəlib.
Təxminən 3 milyon sakinin yaşadığı Kiyevdə insanların böyük hissəsi şəhərdaxili nəqliyyatda metrodan istifadə edir. Mütəxəssislər Rusiyanın körpülərə qarşı bu taktikasının davamlı hücumlara çevriləcəyi təqdirdə şəhərin faktiki olaraq iki hissəyə bölünə biləcəyindən ehtiyat edirlər.
Körpülərin tamamilə dağıdılması çətin hesab olunur
Ekspertlər Rusiyanın pilotsuz uçuş aparatları ilə körpüləri tamamilə dağıtmasının çətin olduğunu bildirirlər. Lakin təkrarlanan hücumların körpülərin bağlanmasına və konstruksiyalarının zəifləməsinə, nəticədə isə onların istifadəyə yararsız vəziyyətə düşməsinə səbəb ola biləcəyi qeyd edilir.
Daha güclü silahların körpüləri dağıtmaq imkanına malik olduğu bildirilir. Həmçinin bəzi körpülərin uzun illər ərzində layihələndirildiklərindən daha ağır nəqliyyat yükü daşıdığı üçün onsuz da pis vəziyyətdə olduğu vurğulanır.
Ukraynalı deputatların yaxın vaxtlarda keçirdiyi iclasda Kiyevdəki körpülərin vəziyyətini müzakirə etdiyi və hər hansı körpünün dağılması halında şəhərin əlaqəsini təmin etmək üçün bərə və ya müvəqqəti ponton körpülərdən istifadəni nəzərdə tutan fövqəladə planlar hazırladığı bildirilir.
Zelenski: “Artıq heç bir qayda qalmayıb”
Rusiya Prezidenti Vladimir Putin isə Rusiyanın Ukraynanın enerji obyektlərinə və digər iqtisadi hədəflərinə qarşı zərbələrinin Ukraynanın Rusiya neft emalı zavodlarına və Qara dənizdəki gəmilərə hücumlarına cavab olduğunu bildirib.
Putin Valday xarici siyasət forumunda çıxışı zamanı Rusiyaya “dayanın” çağırışlarının edildiyini, lakin müharibəni Ukraynanın başladığını iddia edib.
Kreml rəhbəri Kiyevin neft emalı zavodlarına hücumlarının müəyyən nəticələr verdiyini və bunun Rusiya ÜDM-nin təxminən 1 faiz itirməsinə səbəb olduğunu da etiraf edib. Ukrayna isə Rusiya neft infrastrukturuna hücumlarının səbəbinin Kremlin müharibəni maliyyələşdirməsinə mane olmaq olduğunu bildirir.
Ukrayna Prezidenti Volodimir Zelenski isə Putinin Ukraynaya hücum edərkən “artıq heç bir qaydanın qalmadığına” qərar verdiyini deyib.
Zelenski bildirib ki, Rusiya Ukraynanın körpülərini, məlumat mərkəzlərini, internet və mobil rabitə şəbəkələrini, xəstəxanalarını, uşaq bağçalarını, məktəblərini və universitetlərini məhv etmək istəyir.
Rusiya Prezidenti Vladimir Putin 2022-ci ilin fevralında Ukraynaya genişmiqyaslı işğala başladıqdan sonra hər qış Ukraynanın enerji infrastrukturunu hədəfə alıb.
