By Xəbər Yerində ATV-yə istinadən xəbər verir ki, Sabunçu rayonunun Savalan qəsəbəsinin ikinci kvartalında yaşayan sakinlər qrunt suları problemindən əziyyət çəkirlər. Onların sözlərinə görə, əvvəllər evləri və həyətləri su basmasın deyə öz vəsaitləri hesabına çəkdikləri borular dağıdılıb. Nəticədə yağış yağan zaman su yenidən yaşayış evlərinə və həyətlərə dolur.
Ərazidə evlərin həyətlərində su yığılıb, küçələrdə yaranan gölməçələr isə hərəkəti çətinləşdirib. Sakinlər problemin həlli üçün aidiyyəti qurumlara müraciət etmək istəyirlər.
Sakinlər boruların dağıdıldığını iddia edirlər
Sakinlərin bildirdiyinə görə, illər əvvəl qrunt sularının evlərə və həyətlərə dolmasının qarşısını almaq məqsədilə öz hesablarına borular çəkiblər. Həmin borular vasitəsilə su gölə yönləndirilirmiş.
Lakin onların iddiasına əsasən, boruların keçdiyi torpaq sahəsi satıldıqdan sonra həmin xətlər dağıdılıb. Torpaq sahəsini alan şəxsin ərazinin ona məxsus olduğunu əsas gətirərək suyun buradan gölə axıdılmasına etiraz etdiyi bildirilir.
Sakinlərdən biri vəziyyəti belə izah edib: “Əvvəl biz burada öz vəsaitimizlə borular çəkmişdik, suyu gölə axıdırdıq. İndi gölün qabağını kəsiblər, qoymurlar ki, suyu ora axıdaq. Deyirlər, torpaq mənim həyətimdir, buradan su keçirməyə icazə verməyəcəyəm”.
Onların sözlərinə görə, həmin ərazidən 10 ildən çox müddətdə su axıdılıb. İndi isə torpaq sahəsinin yeni sahibinin ortaya çıxması ilə problem yaranıb.
Sakinlər antisanitariya təhlükəsindən narahatdırlar
Ərazidə yaşayanlar bildirirlər ki, qəsəbədə kanalizasiya sisteminin olmaması vəziyyəti daha da çətinləşdirə bilər. Onların fikrincə, həyətlərdə yığılan qrunt suları ilə quyu sularının qarışması antisanitariya vəziyyətinə səbəb ola bilər.
Sakinlər torpaq sahəsinin əsl sahibinin kim olduğunu dəqiq bilmədiklərini, bir neçə nəfərin həmin əraziyə sahib olduğunu iddia etdiyini deyirlər.
Rəsmi qurumdan açıqlama
Məsələ ilə bağlı ərazidə çəkiliş aparan jurnalistlər torpaq sahəsinin sahibini tapa bilmədiklərindən onun mövqeyini öyrənmək mümkün olmayıb.
Savalan qəsəbəsinin inzibati ərazi dairəsi üzrə nümayəndəliyindən isə bildirilib ki, sözügedən torpaq sahəsi çıxarış əsasında şəxsi mülkiyyətdədir. Buna görə də nümayəndəlik əraziyə müdaxilə edə bilməz.
Qurumdan sakinlərə iş saatlarında nümayəndəliyə müraciət etmələri tövsiyə olunub. Bildirilib ki, müraciətdən sonra yaranmış problemin həlli yolları araşdırıla bilər.
