By Xəbər Yerində xəbər verir ki, Fövqəladə Hallar Nazirliyi şəhər yollarında artan nəqliyyat sıxlığı ilə əlaqədar sürücülərə müraciət edib.
Sıxlıq xilasedicilərə mane olur
Nazirliyin məlumatına görə, yay mövsümünün başa çatması və yeni tədris ilinin başlaması ilə şəhərdaxili yollarda avtomobillərin hərəkətində sıxlıq yaranıb. Bu vəziyyət fövqəladə hadisə baş verən ərazilərə operativ şəkildə yollanan yanğınsöndürən və xilasetmə avtomobillərinin hərəkətini çətinləşdirir.
Xüsusilə bəzi sürücülərin xüsusi təyinatlı nəqliyyat vasitələrinə yol verməməsi yanğın, qəza və digər hadisələr zamanı xilasedicilərin ünvana vaxtında çatmasına mane olur.
“Dərhal yol verin”
FHN sürücüləri yollarda hərəkət edən yanğınsöndürən və xilasetmə avtomobillərinə dərhal yol verməyə çağırıb.
Nazirlik xatırladıb ki, operativ nəqliyyat vasitələrinə yol verməyən şəxslər qanunvericiliklə müəyyən edilmiş qaydada məsuliyyət daşıya bilərlər. Bundan əlavə, belə hallar fövqəladə hadisənin nəticələrinin aradan qaldırılmasını gecikdirə və təhlükədə olan insanların həyatının xilas edilməsinə ciddi maneə yarada bilər.
FHN sürücülərə müraciət edərək bu məsələyə xüsusilə diqqətlə yanaşmağı istəyib və bildirib: “Heç kəs fövqəladə hadisədən sığortalanmayıb”.
