By Torontoda Latın festivalində atışma: 2 nəfər ölüb, 4 nəfər yaralanıb
Kanadanın Toronto şəhərində keçirilən böyük Latın küçə festivalında baş verən silahlı insident nəticəsində 2 nəfər ölüb, 4 nəfər yaralanıb.
Polisin məlumatına görə, “Salsa on St. Clair” festivalında təxminən 13 min insanın olduğu ərazidə iki silahlı şəxs arasında atışma baş verib. Hadisə zamanı ümumilikdə 6 nəfər güllə yarası alıb.
Toronto polisinin rəsmisi Frank Barredo bildirib ki, ölən şəxslərin hər ikisi kişi olub. Yaralanan 4 nəfər ağır vəziyyətdə xəstəxanaya yerləşdirilib.
Polis hadisə yerində iki silah aşkarlayıb və üç ayrı ərazidə araşdırma aparır. İlkin məlumata görə, atışma iki şəxsin bir-birini hədəf alması nəticəsində baş verib, lakin çox sayda insan təhlükə ilə üzləşib.
Hadisə zamanı festival iştirakçıları təşvişə düşərək ərazini tərk etməyə çalışıblar. Şahidlər atəş səslərindən sonra insanların qaçdığını və qorxu içində yerə uzanmağa çağırıldığını bildiriblər.
Toronto meri Oliviya Çou hadisəni “məsuliyyətsiz və iyrənc zorakılıq aktı” adlandırıb. Kanadanın Baş naziri Mark Karni isə baş verənlərdən dəhşətə gəldiyini bildirib və həlak olanların ailələrinə başsağlığı verib.
Polis hadisə ilə bağlı araşdırmanı davam etdirir və şübhəlilərin müəyyənləşdirilməsi üçün festival iştirakçılarından məlumat və görüntüləri təqdim etmələrini istəyib.
Mənbə: CNN
