By Bakının Əhmədli qəsəbəsində yerləşən “Ab-hava” kafesində ölümlə nəticələnən kütləvi davanın bəzi təfərrüatları məlum olub. İlkin məlumatlara görə, münaqişə biznes münasibətləri zəminində yaranıb.
Xəbər Yerində Apa TV-yə istinadən xəbər verir ki, hadisədən əvvəl kafenin ikinci mərtəbəsində yerləşən kabinetdə bir qrup şəxs arasında mübahisə düşüb. Münaqişə daha sonra foyedə davam edib.
Dava zamanı “Ceyhun Sabunçu” kimi tanınan şəxs bıçaqlanaraq öldürülüb.
Deputatın oğlunun da adı hallanır
Hadisə ilə bağlı yayılan məlumatlarda Milli Məclisin deputatı Arzuxan Əlizadənin oğlu Əhməd Əlizadənin də adı çəkilir. Məlumata görə, o, hadisədən sonra könüllü olaraq polisə təslim olub.
Daxili İşlər Nazirliyinin Mətbuat Xidmətinin məlumatına əsasən, insidentdə iştirak edən doqquz nəfər müəyyən edilərək saxlanılıb.
Cinayət işi başlanılıb
Faktla bağlı Azərbaycan Respublikası Cinayət Məcəlləsinin 120.1-ci maddəsi ilə cinayət işi açılıb. Hazırda hadisənin bütün təfərrüatlarının müəyyənləşdirilməsi üçün istintaq-əməliyyat tədbirləri davam etdirilir.
Hadisənin şahidlərinin danışdıqları, münaqişənin səbəbləri və qətllə bağlı son məlumatlar videoda təqdim olunur.
Qeyd edək ki, hadisə ilə bağlı yayılan bəzi məlumatlar ilkin iddialara əsaslanır. Hadisənin hüquqi qiyməti istintaqın nəticələrinə uyğun müəyyən ediləcək.
