By Rusiyadan Ermənistana Azərbaycandan növbəti yük göndərildi
Rusiyadan Ermənistana Azərbaycan ərazisindən tranzit keçməklə növbəti tədarük həyata keçirilib.
Xəbər Yerində xəbər verir ki, 8 vaqondan ibarət, ümumi çəkisi 560 ton olan buğda Biləcəri dəmir yolu stansiyasından Böyük Kəsik istiqamətinə yola salınıb.
Məlumata görə, bu, Rusiya mənşəli məhsulların Azərbaycan ərazisindən tranzit keçməklə Ermənistana göndərilməsi üzrə sonuncu tədarük deyil. İndiyədək bu marşrutla Ermənistana 42 min tondan çox taxıl daşınıb.
Bununla yanaşı, Azərbaycan ərazisindən tranzit keçməklə Rusiyadan Ermənistana 9 min tona yaxın gübrə, 1 136 ton propan, 133 ton alüminium, 1 114 ton kömür və 67 min ton taxta göndərilib.
Məlumatda həmçinin qeyd olunur ki, tranzit daşımalarından əlavə, Azərbaycandan Ermənistana müxtəlif neft məhsullarının ixracı da həyata keçirilir. Belə ki, indiyədək Ermənistana 15 min tona yaxın dizel yanacağı, 5 min tona yaxın Aİ-92 və Aİ-95 markalı benzin göndərilib.
Beləliklə, son aylarda Azərbaycan ərazisindən keçməklə Rusiya ilə Ermənistan arasında yük daşımalarının çeşidi və həcmi əhəmiyyətli dərəcədə genişlənib. Əvvəlki tədarüklərdə də müxtəlif həcmdə taxıl, gübrə, yanacaq və digər sənaye məhsulları Azərbaycandan tranzit keçməklə Ermənistana çatdırılıb.
