Gülşən Allahverdiyevanın 10 il 6 aylıq həbs qərarı ləğv edildi

İş adamı Fuad Allahverdiyevi şantaj etməkdə təqsirli bilinərək 10 il 6 ay müddətinə azadlıqdan məhrum edilən keçmiş həyat yoldaşı Gülşən Allahverdiyeva ilə bağlı məhkəmə qərarı ləğv olunub.

Xəbər Yerində Qafqazinfo-ya istinadən xəbər verir ki, Ali Məhkəmə məhkumun şikayətini araşdıraraq qərar qəbul edib.

Ali Məhkəmə işdə qanun pozuntuları müəyyən edib

Şikayəti nəzərdən keçirən hakimlər əvvəlki məhkəmə instansiyalarında işə baxılarkən prosessual pozuntulara yol verildiyi qənaətinə gəliblər. Həmçinin əvvəlki hökm və qərarların işin faktiki halları ilə uzlaşmadığı müəyyən edilib.

Ali Məhkəmə bu əsaslarla Gülşən Allahverdiyevanın şikayətini təmin edib. İş yenidən araşdırılması üçün Bakı Apellyasiya Məhkəməsinə göndərilib.

Fuad Allahverdiyev daha əvvəl həbs olunmuşdu

Xatırladaq ki, iki il əvvəl Gülşən Allahverdiyevanın şikayəti əsasında Fuad Allahverdiyev həbs edilmişdi. O, evli olduqları müddətdə həyat yoldaşına əzab verməkdə və seksual xarakterli hərəkətlərdə ittiham olunurdu.

Lakin məhkəmə Fuad Allahverdiyevə seksual xarakterli hərəkətlər ittihamı üzrə bəraət verib. Əzab verməkdə təqsirli bilinən iş adamına isə elektron qolbaq taxılmaqla azadlığın məhdudlaşdırılması cəzası təyin edilib.

Sonradan Gülşən Allahverdiyeva təqsirləndirilən şəxs olub

Daha sonra iş üzrə vəziyyət dəyişib: bu dəfə Gülşən Allahverdiyeva təqsirləndirilən şəxs, Fuad Allahverdiyev isə zərərçəkmiş qismində tanınıb.

Gülşən Allahverdiyeva keçmiş həyat yoldaşına məxsus şəxsi xarakterli foto və videomaterialları qanunsuz yolla əldə etməkdə, həmin materiallardan tamah məqsədilə istifadə etməkdə və hədə-qorxu ilə külli miqdarda əmlak tələb etməkdə təqsirli bilinib.

Bakı Ağır Cinayətlər Məhkəməsinin hökmü ilə ona 10 il 6 ay həbs cəzası verilib. Bununla belə, övladı 14 yaşına çatanadək — 2029-cu ilə qədər — cəzanın çəkilməsi təxirə salınıb.

Bakı Apellyasiya Məhkəməsinin sonrakı qərarı ilə hökm dəyişdirilib və Gülşən Allahverdiyeva məhkəmə zalında həbs edilib.

Qeyd edək ki, Fuad Allahverdiyev “Ailə TV” və “Caspian Telecom” MMC-nin təsisçisi olub.