By “Xəbər Yerində” “Qafqazinfo”ya istinadən xəbər verir ki, Türkiyədə fəaliyyət göstərən azərbaycanlı alim, professor Aygün Attar İstanbulda Azərbaycanın Baş Konsulluğu qarşısında keçirilən etiraz aksiyasına münasibət bildirib.
O, sosial şəbəkə hesabında Türkiyə-Azərbaycan qardaşlığının heç kimin təsiri ilə pozula bilməyəcəyini vurğulayıb.
“Eyni şüarlar, eyni bəhanələr”
A.Attar qeyd edib ki, sözügedən aksiya ona daha əvvəl baş vermiş hadisələri xatırladıb:
“Heç kim Türkiyə-Azərbaycan qardaşlığını poza bilməz! Dünən Azərbaycanın İstanbuldakı Baş Konsulluğu qarşısında keçirilən etiraz aksiyası ilə bağlı bir neçə söz demək istəyirəm: Biz bu filmi əvvəllər də görmüşük”.
Professor bildirib ki, apardığı araşdırma zamanı həmin şəxslərin 21 yanvar 2011-ci ildə də eyni bəhanə və şüarlarla aksiya keçirdiklərini müəyyənləşdirib.
“Qısa bir araşdırma apardım və məlum oldu ki, həmin şəxslər eyni bəhanə və eyni şüarlarla hələ 21 yanvar 2011-ci ildə də səhnəyə çıxmışdılar. İndi isə 15 illik fasilədən sonra – 3 oktyabr 2026-cı ildə, yəni Türk Dövlətləri Təşkilatı Günündə onlar yenidən ortaya çıxıblar.
Aydındır ki, yenə eyni ssenari gündəmdədir. Ey Türkiyə, ey Azərbaycan – biri ürək, bir can Vətənim – sizcə, bunlar sadəcə təsadüfdürmü?”, – deyə A.Attar əlavə edib.
