By Xəbər Yerində xəbər verir ki, Hindistanın Uttar-Pradeş ştatının Noida şəhərində 28 yaşlı proqram mühəndisi Sambhav Jain 41-ci mərtəbədəki mənzilin balkonundan yıxılaraq həyatını itirib.
İlkin araşdırma zamanı onun maliyyə problemləri, boşanma prosesi və azyaşlı övladının müalicə xərcləri səbəbindən çətin dövr keçirdiyi məlum olub.
Jain Haryana ştatının Manesar şəhərində yaşayır və özəl şirkətlərdən birində proqram mühəndisi kimi çalışırmış.
Hadisədən üç gün əvvəl evdən ayrılıb
Polisin məlumatına görə, Jain hadisədən təxminən üç gün əvvəl Manesardakı evindən çıxıb. Müxtəlif yerlərdə otellərdə qaldıqdan sonra Noidanın 94-cü sektorunda yerləşən “Supernova Spira” adlı hündürmərtəbəli binaya gəlib.
O, burada “Airbnb” vasitəsilə bir günlük mənzil kirayələyib və cümə günü saat 15:00 radələrində mənzilə tək daxil olub.
Atası ilə yazışmaları üzə çıxıb
İstintaq çərçivəsində Jainin telefonu araşdırılıb və onun atası ilə yazışmaları müəyyən edilib.
Məlumata görə, atası oğlundan evə qayıtmasını istəyib və borclarının ödənilməsinə kömək edəcəyini bildirib. Jain isə borclarını ödəyəcəyini yazıb.
Polis yazışmaların onun ciddi maliyyə problemləri yaşadığını göstərdiyini bildirib.
Övladının müalicəsinə milyonlarla rupi xərclənib
Ailənin polisə verdiyi məlumata görə, Jainin təxminən bir yaşlı oğlunun ciddi sağlamlıq problemləri olub.
Uşağın müalicəsinə 30 lakh rupidən (3 milyon rupi) çox vəsait xərcləndiyi bildirilir. Bəzi məlumatlarda bu məbləğin 35 lakh rupiyə çatdığı qeyd olunur.
Bundan başqa, Jainin borclarının olduğu və boşanma prosesindən keçdiyi müəyyən edilib.
Boşanma ilə bağlı da borcu olub
Hindistan mediasının məlumatına görə, Jain boşanma çərçivəsində keçmiş həyat yoldaşına təxminən 15 lakh rupi ödəməli olub.
Bu məbləğin bir hissəsinin ödənildiyi, qalan hissənin isə daha sonra verilməsinin planlaşdırıldığı bildirilir.
Sosial şəbəkələrdə boşanma səbəbilə daha böyük məbləğ tələb edildiyi barədə məlumatlar yayılsa da, polis bu rəqəmlərin doğru olmadığını açıqlayıb. İstintaq orqanları boşanma prosesinin təkbaşına hadisənin səbəbi kimi göstərilə bilməyəcəyini vurğulayıb.
Onu xilas etməyə çalışıblar
Hadisə günü Jainin balkonun kənarına çıxdığını görən şəxslər müdaxilə etməyə çalışıblar.
Yan mənzildə işləyən kondisioner ustalarının onunla danışaraq təhlükəli yerdən uzaqlaşdırmağa çalışdıqları, lakin nəticədə Jainin yüksəkdən yıxıldığı bildirilib.
Polis və məhkəmə-tibbi ekspertiza əməkdaşları hadisə yerinə cəlb olunub. Jainin hadisə yerində öldüyü müəyyənləşdirilib.
Polis binadakı və ətrafdakı təhlükəsizlik kameralarını araşdırır. Onun telefonundakı yazışmalar və digər sübutlar da istintaqa daxil edilib. Meyit yarılması həyata keçirilib və araşdırma davam edir.
Mənbə: Haberler.com
