By Xəbər Yerində Demokrat.az-a istinadən xəbər verir ki, Azərbaycanda pensiya yaşına çatmasına baxmayaraq əmək fəaliyyətini davam etdirən vətəndaşların sayı diqqət çəkir. Hazırda 105 mindən çox şəxs həm pensiya alır, həm də işləyir.
Milli Məclisin deputatı Vüqar Bayramov açıqlamasında bildirib ki, işləyən pensiyaçıların 57 min 374 nəfəri 65 yaşdan yuxarıdır.
75 yaşdan yuxarı 3 907 pensiyaçı işləyir
Deputatın sözlərinə görə, əmək fəaliyyətini davam etdirən pensiyaçılar arasında 38 min 562 nəfər 65-69, 14 min 905 nəfər 70-74, 3 min 907 nəfər isə 75 və daha yuxarı yaş qrupuna daxildir.
Digər işləyən pensiyaçılar isə 65 yaşına çatmadan xüsusi və ya güzəştli şərtlərlə pensiyaya çıxan vətəndaşlardır.
Vüqar Bayramov qeyd edib ki, pensiya aldığı halda işləməyə davam edən və çalışdığı sahəyə töhfə verən şəxslərin fəaliyyəti müsbət qiymətləndirilməlidir. Bu, həm iqtisadi dəyərin yaradılmasına, həm də həmin şəxslərin sosial təminatının yaxşılaşmasına xidmət edir.
Dövlət sektorunda yaş məhdudiyyəti var
Deputat bildirib ki, özəl sektorda əmək fəaliyyəti ilə bağlı yaş məhdudiyyəti yoxdur. Dövlət sektorunun bəzi sahələrində isə müəyyən limitlər tətbiq edilir.
Həmin sahələrdə 65 yaş tamam olduqdan sonra müvafiq dövlət qurumunun razılığı ilə əmək fəaliyyətinin müddəti hər dəfə bir il olmaqla uzadıla bilər.
Bayramov pensiya yaşına çatan, lakin əmək bazarında qalmaq və işlədiyi sahəyə töhfə vermək istəyən vətəndaşların fəaliyyətini davam etdirməsi üçün şərait yaradılmasının vacibliyini vurğulayıb.
Onun fikrincə, bu, həm təcrübəli kadrların bilik və bacarıqlarından istifadə olunması, həm də pensiyaçıların aktiv əmək həyatından kənarda qalmaması baxımından əhəmiyyətlidir.
