By Azərbaycanın Milli Qəhrəmanı Hökümə Əliyevanın doğum günüdür
Bu gün Azərbaycanın Milli Qəhrəmanı, AZAL-ın təyyarə bələdçisi Hökümə Cəlil qızı Əliyevanın doğum günüdür.
Hökümə Əliyeva 1991-ci ildə Kəlbəcər rayonunun Susuzluq kəndində anadan olub. O, 1996-cı ildə ailəsi ilə birlikdə Rusiyaya köçüb və bir müddət Volqoqrad vilayətində yaşayıb. Təhsil həyatına burada başlayan Hökümə şəhərin 78 nömrəli məktəbində 1-ci sinifdən 6-cı sinfə qədər oxuyub.
Daha sonra ailəsi Gəncəyə köçüb. Hökümə təhsilini V.Veysəlov adına 30 nömrəli tam orta məktəbdə davam etdirərək oranı bitirib. Ali məktəbə qəbul imtahanında 612 bal toplayan Hökümə Bakı Dövlət Universitetinin Hüquq fakültəsinə daxil olub.
Ali təhsil aldıqdan sonra aviasiya sahəsində çalışmağa başlayan Hökümə Əliyeva AZAL-da təyyarə bələdçisi kimi fəaliyyət göstərib. Peşə fəaliyyətində sərnişinlərin təhlükəsizliyi və rahatlığının təmin olunması onun əsas vəzifələrindən olub.
Onun adı isə 2024-cü il dekabrın 25-də baş verən təyyarə qəzasından sonra bütün ölkədə tanınıb.
Belə ki, AZAL-ın Bakı-Qroznı marşrutu üzrə J2-8243 saylı reysini həyata keçirən “Embraer 190” tipli sərnişin təyyarəsi Qazaxıstanın Aktau şəhəri yaxınlığında qəzaya uğrayıb. Hadisə nəticəsində təyyarədə olan sərnişinlər və ekipaj üzvləri arasında ölənlər olub.
Qəza zamanı Hökümə Əliyevanın sərnişinləri sakitləşdirməyə çalışması və son anlara qədər öz vəzifəsini yerinə yetirməsi onun fədakarlığının simvoluna çevrilib. Onun səsləndirdiyi “Hər şey yaxşı olacaq” ifadəsi isə faciədən sonra geniş yayılaraq yaddaşlarda qalıb.
Hökümə Əliyevanın göstərdiyi şücaət dövlət tərəfindən də yüksək qiymətləndirilib. O, ölümündən sonra Azərbaycanın Milli Qəhrəmanı adına layiq görülüb.
Hökümə Əliyevanın doğulduğu Kəlbəcər torpağından çıxaraq həyatını aviasiya sahəsinə həsr etməsi, faciə anında isə peşə məsuliyyətini sonadək qoruması onun həyat hekayəsini Azərbaycan ictimaiyyətinin yaddaşında xüsusi yer tutan nümunələrdən birinə çevirib.
Bu gün onun doğum günü həm doğmaları, həm də onu tanıyanlar üçün yalnız kədər deyil, eyni zamanda göstərdiyi cəsarəti və insan həyatına verdiyi dəyəri xatırlamaq baxımından əlamətdar gündür.
