By Yeni elmi araşdırma uzun müddət televizor izləməyin beyin sağlamlığına mənfi təsir göstərə biləcəyini ortaya qoyub. Mütəxəssislər bildirirlər ki, xüsusilə orta yaş dövründə televiziya qarşısında uzun saatlar keçirmək beyin həcminin azalması və idrak funksiyalarının zəifləməsi riski ilə əlaqələndirilir.
“Alzheimer’s & Dementia” jurnalında dərc olunan araşdırma çərçivəsində 1700-dən çox yetkin şəxs təxminən 24 il ərzində izlənilib. Nəticələrə əsasən, televizora daha çox baxan kişilərdə Alzheimer xəstəliyinə həssas olan beyin nahiyələrinin həcminin kiçildiyi müəyyən edilib.
Araşdırma göstərib ki, günün böyük hissəsini oturaq vəziyyətdə keçirən, lakin bu vaxt ərzində kitab oxuyan, tapmaca həll edən, elektron məktubları cavablandıran və ya digər zehni fəaliyyətlərlə məşğul olan insanların beyin sağlamlığı daha yaxşı qorunub.
Tədqiqat zamanı diqqət çəkən məqamlardan biri də kişilərlə qadınlar arasında müşahidə edilən fərq olub. Alimlərin sözlərinə görə, televiziya izləməyin mənfi təsiri kişilərdə qadınlarla müqayisədə daha qabarıq şəkildə özünü göstərib. Bu fərqin səbəbi kimi qadınların oturaq vaxtlarını daha tez-tez bölməsi və ya bioloji xüsusiyyətlər göstərilir.
ABŞ-ın Cənubi Kaliforniya Universitetinin tədqiqatçıları vurğulayıblar ki, təkcə nə qədər oturmağın deyil, həmin vaxt ərzində hansı fəaliyyətlə məşğul olmağın da beyin sağlamlığı üçün mühüm əhəmiyyət daşıyır. Onların fikrincə, televiziya izləmək passiv fəaliyyət hesab olunduğu halda, oxumaq, yazmaq və problem həll etmək kimi məşğuliyyətlər beynin qocalmaya qarşı müqavimətini artırır.
Mütəxəssislər əlavə edirlər ki, müntəzəm idman etmək faydalı olsa da, uzun müddət fasiləsiz televizor izləməyin mənfi təsirlərini tam aradan qaldırmır. Buna görə də ekran qarşısında uzun vaxt keçirən şəxslərə tez-tez fasilə vermək və zehni aktivliyi artıran fəaliyyətlərə üstünlük vermək tövsiyə olunur.
