By Argentinanın şimal-şərqində baş verən güclü daşqınlar təkcə insanlara deyil, vəhşi təbiətə də ciddi ziyan vurub. Çayların məcrasından çıxması nəticəsində timsahlar, zəhərli ilanlar və digər vəhşi heyvanlar yaşayış məntəqələrinə üz tutub. Təbii fəlakət nəticəsində iki nəfər ölüb, 2 mindən çox insan evini tərk etmək məcburiyyətində qalıb.
Xəbər Yerində Haberler-ə istinadən xəbər verir ki, daşqınlar Argentinanın Korrientes və Misiones əyalətlərində ciddi fəsadlara səbəb olub.
Parana və Uruqvay çaylarında suyun səviyyəsinin yüksəlməsi nəticəsində yakare timsahları, çıngıraklı ilanlar, zəhərli yarara ilanları, kapibaralar, armadillolar və kiçik marallar yaşayış məntəqələrinə qədər gəlib çıxıblar.
Xüsusilə Korrientes şəhərinin çay sahilində yerləşən gəzinti ərazilərində vəhşi heyvanların görünməsi xilasetmə qruplarını hərəkətə keçirib. Mütəxəssislər heyvanların bir qisminin sel sularından qaçarkən güclü axına düşərək sürükləndiyini bildiriblər.
Parkda timsah, sahildə isə zəhərli ilan tapıldı
Korrientes şəhərindəki Mitre parkında səhər saatlarında yakare timsahı aşkarlanıb. Şəhərin sahil hissəsində polis və dəniz təhlükəsizliyi əməkdaşları iki kiçik maralı xilas ediblər.
Pelleqrini küçəsi yaxınlığında suyun sahilə sürüklədiyi armadillo təhlükəsiz əraziyə aparılıb. Həmin ərazidə zəhərli çıngıraklı ilan və qanadından yaralanmış su quşu da tapılıb. Paso de la Patria bölgəsində isə daşqınlar səbəbindən yaşayış yerlərini tərk edən iki su samuru görülüb.
15 yaşlı uşağı zəhərli ilan sancdı
Daşqınların yaratdığı təhlükə Korrientes əyalətinin Qoya şəhəri yaxınlığında baş verən hadisə ilə daha da ciddiləşib.
Oktyabrın 16-da ailəsinə heyvanların təxliyəsində kömək edən 15 yaşlı Esekiel çıngıraklı ilan tərəfindən sancılıb. Zəhərlənmə nəticəsində orqanlarının fəaliyyətində ciddi problemlər yaranan yeniyetmə reanimasiya şöbəsinə yerləşdirilib.
Yerli mətbuatın məlumatına görə, onun müalicəsi davam edir. Mütəxəssislər xüsusilə sel suları çəkildikdən sonra otluq və daşlıq ərazilərdə gizlənən ilanlara qarşı diqqətli olmağa çağırıblar.
Xilas edilən vəhşi heyvanların sayı artır
Korrientesdə fəaliyyət göstərən Aquara Vəhşi Təbiəti Mühafizə Mərkəzi daşqınlardan sonra xilasetmə işlərinin əhəmiyyətli dərəcədə artdığını açıqlayıb.
Mərkəzdə 100-dən çox vəhşi heyvanın reabilitasiyadan keçdiyi bildirilir. Onların arasında anasız qalmış 53 kisəli siçan balası da var. Meymunlar, marallar, quşlar və müxtəlif sürünənlər də xilas edilərək mühafizəyə götürülüb.
Mərkəzin nümayəndəsi Katalina Mansedo bildirib ki, bir çox heyvan kilometrlərlə məsafəyə sürükləndikdən sonra sahilə çata bilib. Bu səbəbdən onların bir qismi halsız və güclü stress altında olub.
Xilas edilən heyvanların sağlamlıq vəziyyəti yoxlanılır. Vəziyyəti yaxşı olanlar təbii yaşayış mühitinə qaytarılır, yaralı heyvanlar isə müalicə olunur.
Daşqınlar iki nəfərin həyatına son qoyub
Argentinanın şimal-şərqində baş verən daşqınlar nəticəsində iki nəfər həyatını itirib, 2 mindən çox insan evlərini tərk etməli olub.
Çako əyalətində təxminən 1 200–1 300 nəfərin təxliyə edildiyi, Korrientesdə isə mindən çox insanın evindən ayrıldığı açıqlanıb.
Korrientesdə heyvanlarını daşqından xilas etməyə çalışan iki kənd təsərrüfatı işçisinin boğularaq öldüyü bildirilir. Misiones əyalətində isə güclü yağış və fırtına nəticəsində 100-dən çox evə ziyan dəyib. Bir sıra yollar və körpülər nəqliyyatın hərəkəti üçün bağlanıb.
Mütəxəssislər sakinlərə xəbərdarlıq etdi
Vəhşi təbiət üzrə mütəxəssislər yaşayış məntəqələrində görünən heyvanlara yaxınlaşmamağı tövsiyə ediblər. Sakinlərdən heyvanları tutmağa və yemləməyə çalışmamaq, foto çəkmək məqsədilə onların ətrafına toplaşmamaq tələb olunur.
Mütəxəssislər bildirirlər ki, özünü təhlükə altında hiss edən vəhşi heyvanlar müdafiə məqsədilə hücum edə bilər. Belə hallarla qarşılaşan şəxslərə polisə, yanğınsöndürmə xidmətinə və ya ixtisaslaşmış xilasetmə qruplarına məlumat vermək tövsiyə edilib. Ev itlərinin çay sahillərində gəzdirilərkən qayışda saxlanılmasının da vacibliyi vurğulanıb.
Daşqınların təsiri uzun müddət davam edə bilər
Şimal-şərq Milli Universitetinin mütəxəssisləri daşqınların heyvanların sığınacaq və qida mənbələrini azaltdığını, bunun isə halsızlıq, aclıq və boğulma riskini artırdığını bildiriblər.
Onların fikrincə, sel sularından qaçan heyvanların məhdud ərazilərdə toplaşması xəstəliklərin yayılmasını da asanlaşdıra bilər.
Bölgədə çayların səviyyəsinin yenidən yüksəlməsi ehtimalı nəzərə alınaraq həm yaşayış məntəqələrində, həm də təbii ərazilərdə təhlükənin davam etdiyi bildirilir.
