By 2026-cı il dünya çempionu olan İspaniya millisi vətənə möhtəşəm şəkildə qayıdıb. Komanda Madriddə həm kral ailəsi tərəfindən qəbul edilib, həm də təxminən 2 milyon azarkeşin iştirak etdiyi möhtəşəm qələbə paradı ilə qarşılanıb.
İspaniya millisi əvvəlcə Kral VI Felipe, Kraliça Letisiya, şahzadə Leonor və şahzadə Sofiya ilə Zarsuela Sarayında görüşüb. Kral ailəsi futbolçuları tarixi uğur münasibətilə təbrik edərək, komandanın əzmkarlığını və dünya çempionluğunu yüksək qiymətləndirib.
Bunun ardından dünya çempionlarını daşıyan üstüaçıq avtobus Madridin mərkəzi küçələri boyunca hərəkət edib. Təxminən 2 milyon azarkeş küçələrə axışaraq milli komandanı alqışlayıb, “İspaniya!” şüarları səsləndirib. Futbolçular isə Dünya Kubokunu azarkeşlərə nümayiş etdirərək qələbə sevincini onlarla bölüşüblər.
Paradın son dayanacağı Madridin simvolu sayılan Cibeles meydanı olub. Meydan və ətraf ərazilər İspaniya bayraqları ilə bəzədilib, çempionluq şənlikləri gecə saatlarınadək davam edib.
Qeyd edək ki, İspaniya millisi 19 iyulda ABŞ-nin Nyu-Cersi ştatında keçirilən finalda Argentinanı 1:0 hesabı ilə məğlub edərək tarixində ikinci dəfə dünya çempionu adına sahib çıxıb. Bu, komandanın 2010-cu ildən sonra qazandığı ikinci mundial zəfəri olub.
