By Ukraynanın paytaxtı Kiyev avqustun 20-nə keçən gecə Rusiyanın genişmiqyaslı raket və dron hücumuna məruz qalıb.
Xəbər Yerində xarici mediaya istinadən xəbər verir ki, hücum nəticəsində Kiyevdə ən azı 15 nəfər həyatını itirib, 39 nəfər yaralanıb.
Məlumata görə, Rusiya ordusu hücum zamanı ballistik və qanadlı raketlərlə yanaşı, pilotsuz uçuş aparatlarından da istifadə edib. Ukrayna rəsmiləri xüsusilə ballistik raketlərin hava hücumundan müdafiə sistemləri üçün ciddi təhlükə yaratdığını bildiriblər.
Hücum nəticəsində paytaxtın müxtəlif ərazilərində yaşayış binaları, məktəb və tibb müəssisələri, o cümlədən uşaq xəstəxanası zərər görüb. Dağıntılar altında qalan insanların xilas edilməsi üçün əməliyyatlar davam etdirilib.
Ukrayna Prezidenti Volodimir Zelenski hücumu şərh edərək Rusiyanın zərbəyə əvvəlcədən hazırlaşdığını bildirib. O, ölkəsinin ballistik raketlərə qarşı hava hücumundan müdafiə imkanlarının gücləndirilməsinə ehtiyac olduğunu vurğulayıb.
Kiyev meri Vitali Kliçko isə hücumun nəticələrinin aradan qaldırılması ilə bağlı işlərin davam etdiyini açıqlayıb.
Qeyd edək ki, hadisə ilə bağlı məlumatlar yenilənir və ölən və yaralananların sayı dəyişə bilər.
