By Magistratura təhsilinin müddətinin iki ildən bir ilə endirilməsi təklif edilir.
Xəbər yerində xəbər verir ki, bu təklif magistraturaya qəbul zamanı minlərlə plan yerinin boş qalması fonunda gündəmə gəlib. Təxminən 4 min plan yerinin tutulmaması bu təhsil pilləsinə marağın səbəbləri ilə bağlı müzakirələri yenidən aktuallaşdırıb.
Milli Məclisin deputatı Ceyhun Məmmədov hesab edir ki, magistraturaya marağın azalmasının səbəblərindən biri təhsil müddətinin iki il olmasıdır.
Deputatın fikrincə, problem yalnız müddətlə məhdudlaşmır. Əgər magistr diplomu əmək bazarında bakalavr dərəcəsi ilə müqayisədə məzuna ciddi üstünlüklər qazandırmırsa, gənclərin əlavə iki illik təhsilə marağının azalması təbiidir.
Magistr diplomunun üstünlüklərinə yenidən baxılması təklif olunur
Ceyhun Məmmədov magistratura proqramlarının məzmununun və məzunların əmək bazarındakı imkanlarının yenidən nəzərdən keçirilməsinin vacib olduğunu bildirib.
Onun sözlərinə görə, ali təhsil proqramları daha çevik şəkildə formalaşdırılmalı və əmək bazarının real ehtiyaclarına uyğunlaşdırılmalıdır. Əks halda universitetlər qısamüddətli kurslar və digər alternativ təhsil imkanları ilə rəqabətdə çətinliklərlə üzləşə bilərlər.
Təklif olunan modelə əsasən, magistratura üzrə təhsil müddətinin bir ilədək azaldılması nəzərdə tutulur.
Qeyd edək ki, hazırda bu, yalnız təklifdir. Magistratura təhsilinin müddətinin dəyişdirilməsi ilə bağlı hər hansı rəsmi qərar qəbul edilməyib.
Mənbə: Xəzərxəbər
