By Çexiyanın paytaxtı Praqada etirazçılar parlamentin aşağı palatasının binasına daxil olmağa cəhd ediblər. Polis müdaxiləsindən sonra vəziyyət nəzarət altına alınıb.
Xəbər Yerində Oxu.az-a istinadən xəbər verir ki, bu barədə Çexiya polisi sosial şəbəkə hesabında məlumat yayıb.
Etirazların səbəbi nədir?
Ölkədə narazılığa səbəb olan qanun layihəsi ictimai televiziya və radionun maliyyələşdirilməsi sisteminin dəyişdirilməsini nəzərdə tutur. Layihəyə əsasən, vətəndaşların birbaşa ödədiyi haqlar əvəzinə bu qurumların maliyyələşdirilməsi dövlət büdcəsindən ayrılan vəsait hesabına həyata keçiriləcək.
Etirazçıların fikrincə, bu dəyişiklik ictimai-hüquqi televiziya və radionun fəaliyyətini ciddi şəkildə məhdudlaşdıra, onların hakimiyyətdən asılılığını artıra bilər.
Baş nazirdən müxalifətə çağırış
Çexiyanın Baş naziri Andrey Babiş müxalifət qüvvələrini ictimai televiziya və radionun maliyyələşmə sistemində dəyişikliklərlə bağlı cəmiyyətdə gərginlik yaratmamağa çağırıb.
“Müxalifəti cəmiyyətdə vəziyyəti gərginləşdirməyi dayandırmağa çağırıram. Müstəqil media uğrunda heç bir müharibə getmir. Demokratiya uğrunda mübarizə də yoxdur və medianın milliləşdirilməsi planlaşdırılmır”, – deyə baş nazir bildirib.
O, müxalifəti insanları nümayişlərə çağırmaqla onların sağlamlığını və təhlükəsizliyini riskə atmaqda ittiham edib.
Qanun layihəsi birinci oxunuşda qəbul edilib
Çexiya mətbuatının məlumatına görə, parlamentin aşağı palatası uzun sürən müzakirələrdən sonra ictimai-hüquqi medianın maliyyələşdirilməsi haqqında qanuna dəyişiklikləri birinci oxunuşda qəbul edib.
Müxalif deputatlar dəyişikliklərin əleyhinə səs veriblər. Qanun layihəsi ətrafında mübahisələr ölkədə siyasi gərginliyin artmasına səbəb olub.
