By Qazaxıstanın qərbində arxeoloqlar təxminən 1 500 il əvvələ aid qadın məzarından qızılla bəzədilmiş ayaqqabılar aşkarlayıblar.
Təmtəraqlı geyimlə dəfn edilib
Tapıntı Aktau şəhəri yaxınlığında, Manqışlaq yarımadasındakı Karakabak nekropolunda üzə çıxarılıb. Məzarda yüksək statuslu gənc qadının dəfn edildiyi müəyyənləşdirilib.
Qadının üzərində qızıl lövhələrlə bəzədilmiş baş geyimi və kəmər, həmçinin qızıl detallı ayaqqabılar olub. Arxeoloqlar bəzi bəzəklərin xüsusi olaraq dəfn mərasimi üçün hazırlandığını düşünürlər.
Ayaqqabılar tam qızıldan olmayıb
Araşdırmalara görə, “qızıl ayaqqabılar” adlandırılan tapıntılar tamamilə qızıldan hazırlanmayıb. Ayaqqabıların üzərindəki taxta və digər üzvi materiallardan hazırlanmış detallara nazik qızıl örtüklər tətbiq olunub.
Tapıntının V-VI əsrlərə aid olduğu və həmin dövrdə bölgədə yaşayan elitanın yüksək sosial statusunu əks etdirdiyi bildirilir.
Arxeoloqlar Karakabak ərazisinin həmin dövrdə sənətkarlıq və ticarət mərkəzlərindən biri olduğunu qeyd edirlər.
