By Rusiyanın Ukraynaya qarşı gecə hücumları nəticəsində ölkənin dörd regionunda enerji infrastrukturu zərər görüb, yüz minlərlə ailə elektrik enerjisiz qalıb.
Xəbər Yerində “Reuters”ə istinadən xəbər verir ki, bu barədə Ukrayna Prezidenti Volodimir Zelenski məlumat verib.
Zelenski bildirib ki, Rusiyanın enerji obyektlərinə endirdiyi zərbələrin intensivliyi yüksək olaraq qalır. Onun sözlərinə görə, Moskva ballistik raketlərin qarşısını almaq üçün nəzərdə tutulan müdafiə vasitələrinin çatışmazlığından maksimum yararlanmağa çalışır.
Ukrayna Hərbi Hava Qüvvələrinin açıqlamasına əsasən, şənbə axşamından bazar gününə qədər Rusiya tərəfindən buraxılan 433 uzaqmənzilli drondan 371-i vurulub. Bazar günü səhər saatlarında onlarla pilotsuz uçuş aparatının hələ də havada olduğu bildirilib. Kiyevdə isə gecə yarısından sonra altı dəfə dron təhlükəsi ilə bağlı xəbərdarlıq edilib.
Ukrayna Rusiyanın sənaye obyektini də hədəfə aldığını bildirib
Zelenski Ukrayna qüvvələrinin Rusiyanın Rostov vilayətində yerləşən Kamenski zavoduna zərbə endirdiyini də açıqlayıb. Onun iddiasına görə, müəssisə Rusiya raketlərinin istehsalında iştirak edir. Moskva bu hücumla bağlı hələlik açıqlama verməyib.
Bununla yanaşı, Rusiyanın Nijni Novqorod vilayətinin qubernatoru Gleb Nikitin Ukraynanın gecə saatlarında həyata keçirdiyi genişmiqyaslı dron hücumu nəticəsində sənaye obyektlərindən birinə ciddi ziyan dəydiyini bildirib. O, zərər görən müəssisənin adını açıqlamayıb.
Region rəhbərliyi yanacaqdoldurma məntəqələrinin təminatında problem yaranmaması üçün tədbirlər görüldüyünü bildirib və sürücüləri yalnız ehtiyacları qədər yanacaq almağa, panik alış-verişdən çəkinməyə çağırıb. Bu xəbərdarlıq zərər görən obyektin neft emalı və ya yanacaq təchizatı infrastrukturu ilə əlaqəli ola biləcəyinə işarə edir.
Rusiya Müdafiə Nazirliyi isə gecə ərzində ölkənin müxtəlif bölgələri üzərində 235 Ukrayna dronunun vurulduğunu açıqlayıb.
Qeyd edək ki, cəbhə xəttinin digər istiqamətlərində döyüşlər davam edib. Rusiya və Ukrayna arasında uzunmənzilli hava hücumları da səngiməyib.
