By Xəbər Yerində xəbər verir ki, Azərbaycan Prezidenti İlham Əliyev və Ermənistanın Baş naziri Nikol Paşinyan avqustun 31-də Bişkekdə Şanxay Əməkdaşlıq Təşkilatının Zirvə toplantısı çərçivəsində görüşüblər.
Görüşdə diqqət çəkən məqamlardan biri iki ölkə arasında son dövrdə yaranan iqtisadi və ticarət əlaqələri olub. Azərbaycan tərəfinin Ermənistana neft məhsulları ixrac etməsi, eləcə də üçüncü ölkələrdən Ermənistana müxtəlif məhsulların Azərbaycan ərazisindən tranzitinə başlanması sülh prosesinin real nəticələri kimi qiymətləndirilib.
Artıq bu istiqamətdə konkret göstəricilər də var. Avqustun sonuna olan məlumatlara görə, Azərbaycan Ermənistana təxminən 15 min ton dizel yanacağı, 5 min tona yaxın Aİ-92 və Aİ-95 markalı benzin ixrac edib. Eyni zamanda Rusiya mənşəli on minlərlə ton taxıl və digər yüklər Azərbaycan ərazisindən keçməklə Ermənistana daşınıb.
İlham Əliyev və Nikol Paşinyan iki ölkənin biznes dairələri arasında əlaqələrin genişlənməsini də müsbət qiymətləndiriblər. Tərəflər qarşılıqlı ticarət, iqtisadiyyat və enerji sahələrində əməkdaşlığın artırılması imkanlarını müzakirə ediblər.
Görüşün digər mühüm mövzusu regional nəqliyyat bağlantıları olub. Liderlər “Beynəlxalq Sülh və Rifah naminə Tramp Marşrutu”nun (TRIPP) həyata keçirilməsi üzrə növbəti praktiki addımları nəzərdən keçiriblər. Marşrut boyunca bağlantı layihələrinin reallaşdırılmasının regional iqtisadi əlaqələrə yeni imkanlar açacağı vurğulanıb.
Tərəflər Azərbaycan-Ermənistan dövlət sərhədinin delimitasiyası üzrə komissiyaların fəaliyyətini davam etdirməsinin vacibliyini də qeyd ediblər.
İlham Əliyev və Paşinyan birbaşa təmasları davam etdirmək, sülh prosesini möhkəmləndirmək, dövlətlərarası münasibətlərin normallaşdırılmasını irəlilətmək və regional bağlantıları gücləndirmək barədə razılığa gəliblər.
