By Bakının Səbail rayonunda sakinlər parklanma ilə bağlı yaranmış problemdən narazıdırlar.
Xəbər Yerində Baku Tv-yə istinadən xəbər verir ki, Məmməd Əfəndiyev küçəsində yaşayan sakinlər qaynar xəttə müraciət edərək əvvəl ödənişli parklanma üçün istifadə olunan ərazinin sonradan xidməti parklanma yeri kimi müəyyənləşdirildiyini bildiriblər.
Ödənişli parklanma yeri dəyişdirilib
Sakinlərin sözlərinə görə, əvvəllər avtomobillərini ödənişli əsaslarla saxladıqları ərazidə sonradan parklanma nişanı dəyişdirilib və həmin hissənin xidməti parklanma yeri olduğu göstərilib.
Beləliklə, əvvəllər həmin ərazidən istifadə edən sakinlər artıq burada avtomobil saxlamaq üçün fərqli qaydalarla üzləşiblər.
Qeyd olunur ki, xidməti parklanma yerləri müəyyən qurum və təşkilatların xidməti zərurəti ilə əlaqədar nəqliyyat vasitələrinin saxlanılması üçün nəzərdə tutulur. Belə ərazilərdə müvafiq icazəsi olmayan avtomobillərin saxlanılması isə 40 manat məbləğində cərimə ilə nəticələnə bilər.
Sakinlər alternativ yer istəyirlər
Məmməd Əfəndiyev küçəsində əsasən yaşayış binalarının yerləşdiyi və burada 100-dən çox ailənin yaşadığı bildirilir.
Sakinlərin narazılığı yalnız parklanma yerinin statusunun dəyişdirilməsi ilə bağlı deyil. Onların sözlərinə görə, evlərinə qayıdarkən avtomobillərini saxlamaq üçün yer tapa bilmirlər və buna görə qonşu küçələrdə park etməyə məcbur olurlar.
Bu vəziyyət isə digər küçələrin sakinləri ilə narazılığa və mübahisələrə səbəb olur. Həmin ərazilərdə yaşayanlar da öz avtomobilləri üçün parklanma yeri tapmaqda çətinlik çəkdiklərini və kənardan gələn avtomobillərin onların yerlərini tutmasından narazı olduqlarını bildirirlər.
“100-dən çox ailə avtomobilini harada saxlamalıdır?”
Sakinlərin qarşısında əsas sual xidməti parklanma yerinin məhz yaşayış küçəsində yaradılması və bunun nəticəsində onların parklanma hüququnun necə təmin ediləcəyidir.
Onlar bildirirlər ki, ərazidə xidməti parklanmanın yaradılmasını zəruri edən hər hansı idarə və ya müəssisənin olmadığını düşünürlər.
Qanunvericiliyə əsasən, parklanma yeri təşkil edilmiş avtomobil yolunun müəyyən edilmiş məsafəsində yaşayan sakinlər üçün fərdi parklanma talonu da nəzərdə tutulur. Bu talonla sakinlər müəyyən parklanma yerlərindən ödənişsiz istifadə edə bilərlər.
Sakinlər isə xidməti parklanma tətbiq edilən bu ərazidə onların parklanma imkanlarının necə təmin olunacağını və alternativ yerin nəzərdə tutulub-tutulmadığını soruşurlar.
Məsələ ilə bağlı aidiyyəti qurumların mövqeyi məlum deyil. Qurumların açıqlaması olduğu təqdirdə, mövzu ilə bağlı əlavə məlumat təqdim ediləcək.
