By Portuqaliyalı futbolçu Kriştianu Ronaldonun 2026/2027 mövsümünün startında “Əl-Nəsr”in heyətində yer almayacağı bildirilir.
Xeberyerinde-nin xarici KIV-ə istinadən əldə etdiyi məlumata əsasən, 41 yaşlı hücumçu yeni mövsümdə komandasının ilk iki rəsmi qarşılaşmasını buraxacaq. Ronaldo Səudiyyə Ərəbistanı Liqasının açılış turunda “Əl-Fateh”ə qarşı, həmçinin Kral Kubokunun 1/32 final mərhələsində “Əl-Diriyah”la keçiriləcək oyunda meydana çıxmayacaq.
“Əl-Nəsr” çempionatın ilk turunda avqustun 15-də “Əl-Fateh”lə qarşılaşacaq. Komandanın Kral Kubokundakı görüşü isə üç gün sonra “Əl-Diriyah”a qarşı keçiriləcək.
Ronaldonun uzun müddətdir komandanın hazırlıq prosesindən kənarda qalması da diqqət çəkir. Portuqaliya millisinin 2026-cı il dünya çempionatının 1/8 finalında İspaniyaya 0:1 hesabı ilə uduzaraq mübarizəni dayandırmasından sonra futbolçu iyulun 6-dan etibarən “Əl-Nəsr”in düşərgəsinə qoşulmayıb.
Bildirilir ki, dünya çempionatından sonra Ronaldoya 21 günlük istirahət verilib və həmin müddət başa çatdıqdan sonra onun komandaya dönməsi gözlənilib. Lakin futbolçunun məşqlərə başlamadığı, eləcə də ötən həftə yekunlaşan xarici təlim-məşq toplanışında iştirak etmədiyi qeyd olunur.
Səudiyyə Ərəbistanına qayıtdıqdan sonra da Ronaldo komandanın məşqlərinə qatılmayıb. Məlumata görə, portuqaliyalı ulduz müxtəlif şəhərlərdə təşkil olunan hazırlıq tədbirləri də nəzərə alınmaqla, ümumilikdə 32 gündür “Əl-Nəsr”in məşq prosesindən kənarda qalıb.
Bu səbəbdən Ronaldonun mövsümün ilk iki qarşılaşmasında meydana çıxmayacağı ilə bağlı məlumat onun yeni futbol ilinin başlanğıcında komandasına dəstək ola bilməyəcəyini göstərir.
Qeyd edək ki, “Əl-Nəsr” ötən mövsüm Səudiyyə Ərəbistanı çempionatında qalib gəlib. Klub yeddi illik fasilədən sonra ölkə çempionluğunu əldə edib.
Yeni mövsümdə “Əl-Nəsr” əsas məqsəd kimi çempionluq titulunu qorumağı qarşıya qoyub. Bununla yanaşı, Səudiyyə Ərəbistanı təmsilçisi tarixində ilk dəfə AFC Çempionlar Liqasının Elit turnirində qalib gəlməyi də hədəfləyir.
