By Xəbər Yerində Qafqazinfo-ya istinadən xəbər verir ki, Bakının Nəsimi rayonunda, 28 May küçəsindən “The Ritz-Carlton Baku” otelinə qədər olan ərazidə yeni parkın salınması planlaşdırılır.
Təxminən 10 hektar ərazini əhatə edəcək layihə üzrə artıq hazırlıq işlərinə başlanılıb. Bu barədə Bakı Şəhər İcra Hakimiyyətindən məlumat verilib.
Bildirilib ki, əraziyə ilkin baxış zamanı aşma təhlükəsi olan ağaclar müəyyən edilib. Bunların əsasən ötən əsrin 80-ci illərində Bakıda kütləvi şəkildə əkilmiş qovaq ağacları olduğu qeyd olunub.
Qovaq ağaclarının aşma riski var
Bakı Şəhər İcra Hakimiyyətinin məlumatına görə, qovaq ağaclarının kök sisteminin zəif olması onların aşma ehtimalını artırır. Bu isə həm ətraf mühit, həm də insanların təhlükəsizliyi baxımından risk yaradır.
Mövcud vəziyyət nəzərə alınaraq, ərazidə hazırlıq işləri çərçivəsində qəzalı ağacların götürülməsi nəzərdə tutulur. Layihəyə əsasən, gələcəkdə burada geniş yaşıllıq sahəsinə malik park salınacaq, yeraltı avtomobil dayanacağı tikiləcək və xeyli sayda yeni ağac əkiləcək.
Ağacın kəsilməsi zamanı qayda pozuntusu aşkarlanıb
Qurumun açıqlamasında qeyd olunub ki, işlərin icrası zamanı Yaşıllaşdırma Təsərrüfatı Birliyinin əməkdaşlarından birinin ağac kəsərkən aqrotexniki qaydalara riayət etmədiyi müəyyənləşdirilib.
Bildirilib ki, həmin ağacın gövdəsi içəridən çürümüş vəziyyətdə olsa da, bu hal onun kəsilməsi zamanı müvafiq qaydalara əməl olunması tələbini aradan qaldırmır. Ağacın qəzalı vəziyyətdə olması və ya gövdəsinin çürüməsi belə, onun götürülməsi prosesinin müəyyən edilmiş aqrotexniki tələblərə uyğun aparılmasını zəruri edir.
Aşkarlanmış nöqsanla bağlı dərhal müvafiq inzibati tənbeh tədbiri görülüb. Bundan əlavə, işində yol verdiyi nöqsanlara görə həmin əməkdaş tutduğu vəzifədən azad edilib.
Sakinlərə izahat verilməsi tapşırılıb
Bakı Şəhər İcra Hakimiyyətindən bildirilib ki, Yaşıllaşdırma Təsərrüfatı Birliyinin əməkdaşlarına ərazidə görülən işlərlə bağlı ətrafda yaşayan sakinlər arasında maarifləndirmə tədbirlərinin aparılması yenidən tapşırılıb.
Əməkdaşlar sakinlərə layihənin məqsədi, qəzalı ağacların yarada biləcəyi təhlükələr və həyata keçirilən tədbirlərin zəruriliyi barədə ətraflı məlumat verməlidirlər.
