By Xəbər Yerində “Oxu.Az”a istinadən xəbər verir ki, Bakının Sabunçu, Binəqədi və Suraxanı rayonlarında 150-dək binanın sökülməsi planlaşdırılır.
Bu barədə Azərbaycan Qiymətləndiricilər Cəmiyyəti İdarə Heyətinin sədri Vüqar Oruc məlumat verib.
Onun sözlərinə görə, siyahıya daxil edilən binaların bir hissəsində artıq söküntü işlərinə başlanılıb. Digər binalarda isə inventarlaşdırma, qiymətləndirmə və siyahıların hazırlanması həyata keçirilir. Bəzi ərazilərdə isə söküntü ilə bağlı planlaşdırma prosesi davam etdirilir.
Binaların sökülməsi necə həyata keçiriləcək?
Vüqar Oruc bildirib ki, binanın qəzalı vəziyyətdə olması və ya istismar müddətinin başa çatması müvafiq dövlət qurumlarının yaratdığı komissiyanın rəyi ilə rəsmiləşdirilməlidir.
Bundan sonra həmin bina rəsmi şəkildə qeydiyyata alınır, mənzillərin sahəsi və digər zəruri məlumatlar müəyyənləşdirilir. Növbəti mərhələdə isə ərazidə satınalma prosesinin həyata keçirilməsi üçün tender keçirilməlidir.
Sökülən binanın yerində yeni bina tikilərsə…
Qiymətləndiricilər Cəmiyyətinin rəhbəri qeyd edib ki, sökülən binanın yerində yeni yaşayış binası inşa ediləcəyi halda vətəndaşlara aylıq 600 manat kirayə haqqı ödənilməsi nəzərdə tutulur.
Ərazidə yeni bina tikilməyəcəyi, əvəzində abadlaşdırma işləri aparılacağı və ya torpaq sahəsinin dövlət planına uyğun istifadə ediləcəyi təqdirdə isə vətəndaşlara birbaşa kompensasiya ödəniləcək.
Kompensasiya nə qədər olacaq?
Vüqar Oruc bildirib ki, binaların sökülməsi ilə bağlı vətəndaşlardan Azərbaycan Qiymətləndiricilər Cəmiyyətinə çoxsaylı müraciətlər daxil olur. O qeyd edib ki, proses **“Bakı şəhərinin 2040-cı ilədək inkişafına dair Baş planı”**na uyğun olaraq mərhələli şəkildə həyata keçirilir.
Hansı binaların əvvəl, hansılarının isə daha sonra söküləcəyi müvafiq icra hakimiyyəti orqanı ilə investorların birgə qərarından asılı olacaq. Çünki yeni yaşayış binalarının inşası üçün investorun cəlb edilməsi zəruridir və bu proses qarşılıqlı razılaşma əsasında həyata keçirilir.
Onun sözlərinə görə, kompensasiyanın məbləği təxminən 1000-3000 manat aralığında dəyişə bilər. Ödənişlər konkret ərazidəki bazar qiymətləri nəzərə alınmaqla hesablanacaq.
Qeyd olunub ki, sökülməsi nəzərdə tutulan obyektlər arasında təkcə çoxmənzilli binalar deyil, fərdi yaşayış evləri və yataqxanalar da yer alır.
