İngiltərə Norveçi əlavə vaxtda məğlub edərək yarımfinala yüksəldi – Tarixi rekord qeydə alındı

2026-cı il FIFA Dünya Kubokunun dörddəbir finalında İngiltərə millisi dramatik keçən qarşılaşmada Norveçi əlavə vaxtda 2:1 hesabı ilə məğlub edərək yarımfinala vəsiqə qazanıb.

Matçın əsas vaxtı 1:1 hesablı heç-heçə ilə yekunlaşıb. Əlavə vaxtda Jude Bellinqemin vurduğu həlledici qol İngiltərəyə qələbə qazandırıb. Bellinqem görüşdə iki dəfə fərqlənərək komandasının ən məhsuldar oyunçusu olub.

Bu nəticə İngiltərə futbolu üçün tarixi hadisə ilə də yadda qalıb. Bellinqemin dubllu sayəsində Dünya Kuboku tarixində ilk dəfə eyni turnuvada iki ingilis futbolçu beş və ya daha çox qol vurmağı bacarıb. Hazırda həm Harry Keyn, həm də Jude Bellinqemin hesabında altı qol var.

Haalandın uzun sürən qol seriyası başa çatdı

Norveç millisinin ulduz hücumçusu Erlinq Haaland bu qarşılaşmada fərqlənə bilməyib. O, bundan əvvəl Norveç yığmasının heyətində keçirdiyi son 14 rəsmi matçın hər birində qol vuraraq ümumilikdə 27 dəfə rəqib qapılarına yol tapmışdı.

Haaland 2026-cı il Dünya Kubokunda indiyədək 17 zərbə endirib, onlardan 11-i qapıya dəqiq olub. Lakin İngiltərə ilə oyunda onun təsirli qol seriyası sona çatıb.

Bellinqem böyük turnuvalarda parlayır

2020-ci ildə İngiltərə millisində debüt edən Jude Bellinqem milli komandadakı 12 qolundan 9-nu Dünya Kuboku və Avropa çempionatı kimi nüfuzlu turnuvalarda vurub. Bu göstərici onun məhz böyük oyunlarda daha məhsuldar çıxış etdiyini nümayiş etdirir.

İngiltərə 8 ildən sonra yenidən son dördlükdə

İngiltərə millisi 2018-ci ildə Rusiyada keçirilən Dünya Kubokundan sonra ilk dəfə mundialın yarımfinalına yüksəlib.

Xatırladaq ki, ingilislər 2018-ci il Dünya Kubokunun yarımfinalında əlavə vaxtda buraxdıqları qolla Xorvatiyaya 1:2 hesabı ilə məğlub olaraq finala yüksəlmək şansını əldən vermişdilər.

Ceyden Adamsın xatirəsi anılıb

Qarşılaşmadan əvvəl 25 yaşında vəfat edən Cənubi Afrika millisinin futbolçusu Ceyden Adamsın xatirəsi bir dəqiqəlik sükutla yad edilib.

Adams 2026-cı il Dünya Kubokunda Cənubi Afrika millisinin heyətində üç oyunda meydana çıxmışdı.

Mənbə: TRTSPOR